প্ৰেমৱাক

কাইলৈ ৰাতিপুৱা অলপ সোনকালে উঠিবাচোন
বেলি উঠা চাব যাম
বহুদিন হ’ল গাত ঔষধি বতাহ ছটিওৱা নাই
এন্ধাৰ পোহৰৰ দোমোজা চোৱা নাই
পোহৰৰ লাজত কিদৰে তৰা লুকুৱায় তাকোতো দেখা নাই
অলপ সোনকালেই উঠিবাচোন
প্ৰেমৱাকত যাম

অনুৰাধাৰ ফুটপাথত দুৱৰি অনৰ্থক
মোৰ গাওঁলৈ আহিবা
কাৱৈ চেঙেলীয়ে কিদৰে নিয়ৰত নাচে
চাক্ষুষ চাই যাবা
নুশুনো সেই নগৰৰ কাউৰীৰ কা কা
মোৰ চুবুৰীলৈ আহিবা
তামোল গছত যুৰীয়া শালিকিৰ
প্ৰেম-প্ৰীতি চাবা

জানা কুকুৰাৰ ডাকত তোমাক কামাখ্যাৰ সাধু কব মন
দুয়ো একেলগে শেৱালী বুটলাও বহুদিনৰে মন

নৈৰ পাৰতে আমাৰ প্ৰেমৱাক সামৰিম
যাওঁতে মাথো তুমি ধানপাতবোৰ চাবা
নিবিচাৰিলেও প্ৰভাতী পক্ষীৰ কিৰিলি শুনিব পাবা
অদৃষ্ট নহয় শিশুৰ ধেমালি
অশ্ৰাব্যও নহয় ৰুণ
জাক জাক মাছুৱৈয়ে মাত লগাবই দিয়াচোন

অলপ সোনকালেই উঠিবাচোন
তোমাৰ সতে কাইলৈ প্ৰেমৱাকত যাম
বেলি উঠা চাম

....ණ যজ্ঞেশ্বৰ নাথ