অকবিতা

চাহপাত, অকণমান চেনি

গাখীৰ আৰু পানী দিলে

চাহখিনি আপুনি নিজেও কৰিব পাৰে।

ঘৰুৱা আদা, ডালচেনি পাত আৰু বেলগুৰি

নিদিলোয়ে যেনিবা আজি

উকা কাগজ, অভিধান এখন

আৰু কলমো এটা দিলোঁ।

আপুনিয়েই লিখকচোন কবিতা এটা আজি

ছন্দ, যথোচিত শব্দ আৰু সুখপাঠ্য

নহ’লেও গ্ৰহণযোগ্য

....ණ যজ্ঞেশ্বৰ নাথ 

মাছুৱৈৰ দুখ

ওৰে দিনটো জালখন লৈ নৈতে কটালে

মাছটোহে জালত নপৰে

নপৰেহে নপৰে!

তথাপিতো মাছুৱৈৰ দুখ নাই

ভাৱিলে, এহ নৈখনতে মাছ নাই।

যেতিয়াই গাৰ বোকা-লেতেৰা ধুই বামত উঠিলে

তেতিয়াই এজাক পানী ছিটিকাই মাছটো জপিয়াই উঠিলে!

....ණ যজ্ঞেশ্বৰ নাথ 

ভালপোৱা

এতিয়াও তোমাক মই ভালপাওঁ

কিন্তু পাৰ্থক্য মাথো এটাই

আগৰ ভালপোৱাবোৰত আশা আছিল

আৰু এতিয়াৰ ভালপোৱাবোৰত আশা নাই

....ණ যজ্ঞেশ্বৰ নাথ 

ঠিকনা

এবাৰ লগ পাও বুলি মোৰ ঠিকনাত খোজ নিদিবা
সঘনাই সলনি হয় মোৰ বৰ্তমানৰ ঠিকনা
ভিন-ভিন গাঁওে-ভূঞে
ইখন-সিখন চহৰে নগৰে
গঢ়ি উঠে মোৰ অস্থায়ী ঠিকনা।
একেটা নম্বৰত ফোন কৰি কৰিও
হৱাটছ্এপত বাৰ্তা দি দিও
মোৰে সংযোগ নহ’বও পাৰা
পৰ্বতে-জংঘলেনো ক’ত ইণ্টাৰনেট সেৱা
দেশে-বিদেশেও সলনি হয় নম্বৰ সংখ্যা
স্থায়ী ঠিকনাত মোক, নাই নাই নাপাবা

অস্থায়ী ঠিকনাৰে মোৰ অস্থায়ী জীৱন!

এতিয়া মনো অস্থায়ী
কেতিয়াবা আকাশত
কেতিয়াবা বতাহত
অ’ত- ত’ত
মুহূৰ্তে-মুহূৰ্তে মন দেহৰ বাহিৰত
সেয়ে সন্মুখত দেখিও কেতিয়াবা নামাতিলে আঁচৰিত নহ’বা
মনো এতিয়া সলায় তাৰ স্থায়ী ঠিকনা

....ණ যজ্ঞেশ্বৰ নাথ 

শ্ৰদ্ধাঞ্জলি

শিল্পীয়েই যেতিয়া হেৰাই যায়

সংষ্কৃতিও দুখোজ পিছ পৰি ৰয়

অনুভৱ নকৰাকৈয়ে লোপ পায়

অলেখ অনুভূতি

মেৰুদণ্ড ভাঙি যায়

হাহাকাৰ কৰি উঠে এটা জাতি

শোকাকুল অনুৰাগীয়ে কি কৰিব

চঁকুলোত সেমেকে মেদিনী

তেতিয়া তেওঁ আছিল

আশাও আছিল

এতিয়া যে ভাষাও নাই!

....ණ যজ্ঞেশ্বৰ নাথ 

কবিতাৰ কানন

কোননো মই এই কবিতাৰ কাননত?

এপাহ ফুল হলেওতো কথা নাছিল

নাইবা পলসুৱা এডৰা মাটি!

এতিয়াযে মই

ভাঙি যোৱা এক নিৰ্জীৱ ফুলদানি

....ණ যজ্ঞেশ্বৰ নাথ 

মোৰ মন

কামাখ্যাৰ এডাল এডাল মালা তোমাক পিন্ধাই চাব মন

সেউজীয়া সানি সানি

তোমাৰ সৈতে একেলগে

কামাখ্যাৰ পৰা মোৰ তললৈ খোজকাঢ়ি নামিবৰ মন

....ණ যজ্ঞেশ্বৰ নাথ 

ৰুমাল

চঁকুপানীৰে দুখখিনি ধুই

তোমাৰ সাহসত শুকুৱাই তুলিলোঁ।

দুখকেই মচিবলৈ এতিয়া

মই এখন তোমাৰ ৰুমাল হৈ পৰিলোঁ

....ණ যজ্ঞেশ্বৰ নাথ 

ভালপোৱা

তুমি যদি কৰবাৰ পৰা চাই আছা

এবাৰ সমাধিস্থললৈ আহিবা

তোমাৰ সমাধিত

মোৰেই নামফলক দেখিবা

....ණ যজ্ঞেশ্বৰ নাথ 

ভ্ৰম

যদিও জানো

কাহানিও আৰু তুমি মোৰ নোহোৱা

তথাপি এনে লাগে

এই যেন তুমি ঘূৰি আহিবা

....ණ যজ্ঞেশ্বৰ নাথ